Dan 9 | NdeIBE | STEP | Ngomnyaka wokuqala kaDariyu indodana kaZekisi (umMede ngosendo), owenziwa umbusi phezu kombuso waseBhabhiloni

Daniel 9

Umthandazo kaDanyeli

1 Ngomnyaka wokuqala kaDariyu indodana kaZekisi (umMede ngosendo), owenziwa umbusi phezu kombuso waseBhabhiloni

2 ngomnyaka wokuqala wokubusa kwakhe, mina Danyeli ngezwa emiBhalweni, mayelana lelizwi likaJehova elaphiwa uJeremiya umphrofethi, ukuthi incithakalo yeJerusalema yayizakuba khona okweminyaka engamatshumi ayisikhombisa. 3 Yikho ngaphendukela kuJehova uNkulunkulu ngamncenga ngomthandazo langokulabhela, langokuzila, ngigqoke amasaka ngazininda ngomlotha.

4 Ngakhuleka kuJehova uNkulunkulu wami ngafakaza ngathi: “O Jehova, Nkulunkulu omkhulu, owesabekayo, ogcina isivumelwano sakhe sothando lalabo bonke abamthandayo, abagcina imilayo yakhe, 5 senzile isono njalo senza okubi. Sisuke saxhwala, sahlamuka; siyifulathele imilayo yakho kanye lemithetho yakho. 6 Kasizilalelanga izinceku zakho abaphrofethi abakhuluma ngebizo lakho emakhosini ethu, lamakhosana ethu lakubobaba lakubo bonke abantu belizwe.

7 “Jehova, ulungile, kodwa ngaleli ilanga sembeswe ngehlazo, abantu bakoJuda labantu beJerusalema lo-Israyeli wonke, abaseduze labakude, kuwo wonke amazwe lapho osihlakazele khona ngenxa yokungathembeki kwethu kuwe. 8 O Jehova, thina lamakhosi ethu, lamakhosana ethu kanye labobaba sembeswe ngehlazo ngokuba senzile isono kuwe. 9 UJehova uNkulunkulu wethu ulesihawu, uyathethelela loba thina simhlamukele; 10 kasimlalelanga uJehova uNkulunkulu wethu, njalo kasiyigcinanga imithetho asipha yona ngezinceku zakhe abaphrofethi. 11 U-Israyeli wonke uwephule umthetho wakho wafulathela, esala ukukulalela. “Ngakho iziqalekiso lezahlulelo ezifungelwayo ezibhaliweyo eMthethweni kaMosi, inceku kaNkulunkulu, zithululelwe phezu kwethu, ngokuba senzile isono kuwe. 12 Usuwagcwalisile amazwi okusilahla njalo alahla ababusi bethu ngokusehlisela incithakalo enkulu. Ngaphansi kwalo lonke izulu kakukaze kwenziwe ulutho olulingana lalokhu osekwenziwe eJerusalema. 13 Njengoba kulotshiwe eMthethweni kaMosi yonke le incithakalo yehlele kithi, ikanti kasicelanga umusa kaJehova uNkulunkulu wethu ngokufulathela izono zethu sifunisise iqiniso lakho. 14 UJehova kathikazanga ukwehlisela incithakalo phezu kwethu, ngokuba uJehova uNkulunkulu wethu ulungile kukho konke akwenzayo; kodwa kasimlalelanga.

15 “Manje-ke, O Jehova Nkulunkulu wethu, owakhupha abantu bakho eGibhithe ngesandla esilamandla njalo owazenzela ibizo elimiyo kuze kube namhla, senzile isono, senzile okubi. 16 “O Jehova, ngenxa yemisebenzi yakho yonke elungileyo, qambula ulaka lwakho lentukuthelo yakho kusuke eJerusalema, idolobho lakho, intaba yakho engcwele. Izono zethu lezinengiso zabobaba sezenze iJerusalema labantu bakho baba yinto yokuhlekisa kubo bonke abakhelene lathi.

17 “Manje-ke, Nkulunkulu wethu, zwana imithandazo lokulabhela kwenceku yakho. Ngenxa yebizo lakho, O Jehova, ake uhawukele indlu yakho engcwele esibhidlikile. 18 Beka indlebe yakho, O Nkulunkulu, uzwe; vula amehlo akho ubone incithakalo yedolobho elibizwa ngeBizo lakho. Kasilethi lezizicelo kuwe ngoba silungile, kodwa ngenxa yesihawu sakho esikhulu. 19 O Jehova, lalela! O Jehova, thethelela! O Jehova, zwana wenze! Ngenxa yebizo lakho, O Nkulunkulu wami, ungaphuzi, ngokuba idolobho lakho labantu bakho kubizwa ngeBizo lakho.”

“Izikhombisa” ezingamatshumi ayisikhombisa

20 Ngathi ngikhuluma njalo ngikhuleka, ngivuma isono sami, lesono sabantu bakithi abako-Israyeli, ngiletha isikhalo sami kuJehova uNkulunkulu wami ngentaba yakhe engcwele –

21 ngilokhu ngisakhuleka, uGabhriyeli, indoda engayibonayo embonweni wokuqala, weza kimi entweza kungesikhathi somhlatshelo wakusihlwa.

22 Wangilaya wathi kimi, “Danyeli, khathesi sengilande ukukupha ukuqonda lokuzwisisa.

23 Wonele ukuqalisa ukukhuleka impendulo yahle yaphiwa, eyiyo engizokutshela yona, ngokuba uyaqakathekiswa kakhulu. Ngakho-ke, cabanga ngalo ilizwi, uwuzwisise umbono ukuthi:

24 “Amatshumi ayisikhombisa ‘ezikhombisa’ (amaviki) asequnyelwe abantu bakini ledolobho lenu elingcwele ukuqedisa ukona, ukukhawula isono, ukuhlawulela ububi, ukuletha ukulunga okungapheliyo, ukuphetha umbono lesiphrofetho lokugcoba indawo engcwelengcwele.

25 “Yazi njalo uzwisise lokhu: Kusukela ekukhutshweni kwesimemezelo sokuthi kuvuselelwe njalo kwakhiwe kutsha iJerusalema kuze kufike umbusi ongo-Gcotshiweyo kuzakuba ‘lezikhombisa’ (amaviki) eziyisikhombisa ‘lezikhombisa’ ezingamatshumi ayisithupha lambili. Lizakwa-khiwa libe lemigwaqo lomgelo, kodwa kuyi-zikhathi zohlupho. 26 Ngemva ‘kwezikhombisa’ lezo ezingamatshumi ayisithupha lambili oGcotshiweyo uzaqunywa afe engelalutho. Abantu bombusi ozakuza bazalibhidliza idolobho lendlu yenkonzo. Ukuphela kuzafika njengesikhukhula: Impi izaqhubeka kuze kube sekupheleni, sekumenyezelwe izincithakalo. 27 Uzaqinisa isivumelwano labanengi ‘okwesikhombisa’ esisodwa. Phakathi ‘kwesikhombisa’ uzacinisa imihlatshelo leminikelo. Kuzakuthi eceleni lethempeli uzabeka isinengiso esibanga incithakalo, kuze kuthi ukucina okumisiweyo kuchithelwe kuye.”